សេចក្តីស្រឡាញ់ពិត
សេចក្តីស្រឡាញ់ពិត អាចជារឿងតែមួយគត់ ដែលមនុស្សគ្រប់រូប ខិតខំស្វែងរកឲ្យតម្លៃលើសជាងអ្វីៗទាំងអស់ ដូចជាប្រសើរជាងលុយ កិត្តិនាម ឬភាពជោគជ័យក៏ដោយ។ Mater Teresia ធ្លាប់និយាយថា៖ «នៅក្នុងលោកនេះ មនុស្សមានការស្រេកឃ្លាន និងពេញចិត្តចំពោះសេចក្ដីស្រឡាញ់ ជាជាងម្ហូបអាហារ» ។ Benjamin Disraeli ជាអ្នកនិពន្ធ និងអ្នកនយោបាយជនជាតិអង់គ្លេសធ្លាប់បានសរសេរថា៖ «យើងទាំងអស់គ្នាកើតមកសម្រាប់សេចក្តីស្រឡាញ់ គឺជាគោលការណ៍ នៃអត្ថិភាព និងជាចុងបញ្ចប់តែមួយគត់នៃអត្ថិភាព»។ Franklin P. Jones ជាពាណិជ្ជករជនជាតិអាមេរិក បាននិយាយថា «សេចក្ដីស្រឡាញ់មិនធ្វើឲ្យផែនដីវិលបានទេ ប៉ុន្តែសេចក្ដីស្រឡាញ់ ធ្វើឲ្យដំណើរជីវិតកាន់តែមានតម្លៃ!»។
សេចក្តីស្រឡាញ់ គឺជាអ្វីដែលយើងគ្រប់គ្នាប្រាថ្នាចង់បាន វាធ្វើឲ្យជីវិតយើងមានតម្លៃ និងមានន័យ បើគ្មានសេចក្តីស្រឡាញ់ទេ យើងមានអារម្មណ៍ថាមិនពេញលេញ ខ្វះខាតអ្វីម្យ៉ាង ។ តើយើងអាចរកឃើញសេចក្តីស្រឡាញ់ នៅឯណា?
មនុស្សភាគច្រើនមានបទពិសោធន៍ពីសេចក្តីស្រឡាញ់ ដំបូងឪពុកម្តាយបងប្អូនប្រុសស្រីរបស់ពួកគេ។ នៅពេលធំឡើង សេចក្ដីស្រឡាញ់មកពីមិត្តភក្តិ បន្ទាប់ពីរៀបការ សេចក្ដីស្រឡាញ់មកពីដៃគូ និងកូនៗ ។ ជាការពិតសេចក្តីស្រឡាញ់របស់គ្រួសារ និងមិត្តភក្តិ គឺដើរតួយ៉ាងសំខាន់នៅក្នុងជីវិតរបស់យើង។
ថ្វីដ្បិតតែ សេចក្តីស្រឡាញ់ស្រស់ស្អាត តែត្រូវបានកំណត់ដោយពេលវេលា និងកាលៈទេសៈ ឪពុកម្តាយស្លាប់ទៅ បងប្អូនប្រុសស្រីរៀបការ ហើយផ្លាស់ទីលំនៅ មិត្តភក្តិបែកគ្នា កូនៗ ធំឡើងរៀបការ ហើយក្លាយជាគ្រួសារ និងគ្រួសារដាច់ដោយឡែកពីគ្នា។ លើសពីនេះ សេចក្តីស្រឡាញ់ដែលយើងទទួលបាន គឺមានការកំណត់។ ពេលខ្លះមិត្តភក្តិរវល់ពេក សូម្បីតែពេលស្តាប់សំលេងរបស់យើងក៏គ្មានដែរ។ បងប្អូនប្រុសស្រីពេលខ្លះជួយយើងក៏មានការកំណត់។ ប្តីប្រពន្ធបានលែងលះគ្នាដោយសារតែពួកគេលែងមានអារម្មណ៍ស្រឡាញ់គ្នា។ ពេលខ្លះយើងថែមទាំងឈឺចាប់ដោយសារមនុស្សដែលយើងស្រលាញ់ ទាំងអស់នេះធ្វើឲ្យយើងគិតថា តើអ្នកណាអាចផ្តល់សេចក្តីស្រឡាញ់អស់កល្បដោយគ្មានលក្ខខណ្ឌ និងគ្មានដែនកំណត់បាន?
ចម្លើយគឺ “មាន!”
នៅពេលដែលយើងមានភាពមិនសក្ដិសម តែមានម្នាក់ដែលស្រឡាញ់យើង។ ទ្រង់ស្រឡាញ់យើងហើយថែមទាំងលះបង់ជីវិតរបស់ទ្រង់ដើម្បីយើងទៀតផង។ សេចក្តីស្រឡាញ់របស់ទ្រង់ចំពោះយើង គឺអស្ចារ្យណាស់ ហើយលើសពីចំណេះដឹង និងការយល់ដឹងរបស់យើងថែមទៀតផង។
ម្នាក់នេះ គឺជាព្រះយេស៊ូវគ្រីស្ទ។
ព្រះយេស៊ូវគ្រីស្ទស្រឡាញ់មនុស្សលោក ហើយថែមទាំងបានលះបង់ជីវិតរបស់ទ្រង់នៅលើឈើឆ្កាង ដើម្បីឲ្យយើងបានប្រោសលោះរួចពីអំពើបាប (១យ៉ូហាន ៤. ៩-១០) ។ សេចក្តីស្រឡាញ់របស់យើងចំពោះអ្នកដ៏ទៃមានកំណត់ ហើយយើងតែងតែគិតដល់ភាពងាយស្រួលផ្ទាល់ខ្លួនរបស់យើងជាមុន។ ប៉ុន្តែព្រះយេស៊ូវគ្រីស្ទបានផ្តល់ជីវិតរបស់ទ្រង់ ដើម្បីឲ្យយើងបានសោយសុខនឹងជីវិតអស់កល្បជាមួយទ្រង់។
ព្រះយេស៊ូវបានសុគតជំនួសយើង មិនមែនដោយសារយើងសក្តិសមនឹងទទួលនោះទេ។ ផ្ទុយទៅវិញទ្រង់សុគតជំនួសយើង ទាំងដែលយើងជាសត្រូវ និងជាមនុស្សមានបាប (រ៉ូម ៥. ៨) ។ យើងស្រឡាញ់តែមនុស្សដែលយើងចូលចិត្ត ឬអ្នកដែលសក្តិសមនឹងឲ្យយើងស្រឡាញ់។ យើងកម្រស្រឡាញ់សត្រូវរបស់យើង និងមនុស្សដែលមិនដឹងគុណ ឬជាមនុស្សដែលយើងគិតថាមិនគួរឲ្យស្រឡាញ់។ នៅក្នុងព្រះនេត្ររបស់ព្រះយេស៊ូវ ថ្វីដ្បិតតែយើងជាមនុស្សដែលមិនសក្តិសមនឹងទទួលព្រះគុណរបស់ទ្រង់ក៏ដោយ តែទ្រង់បានលះបង់ជីវិតខ្លួន ព្រោះទ្រង់ស្រឡាញ់យើង។
ព្រះយេស៊ូវស្រឡាញ់យើងដោយសេចក្តីស្រឡាញ់អស់កល្បជានិច្ច។ ថ្ងៃណាមួយសេចក្ដីស្រឡាញ់របស់យើងចំពោះអ្នកដទៃ នឹងត្រូវបានកាត់ផ្ដាច់ ដោយសារការប្រែប្រួលទៅតាមកាលៈទេសៈ ឬការស្លាប់របស់យើង។ ទោះយ៉ាងណាក៏ដោយ គ្មានអ្វីអាចពង្រាត់យើងចេញពីសេចក្តីស្រឡាញ់របស់ផងព្រះគ្រីស្ទបានឡើយ ទោះបីជាជួបកាលៈទេសៈជុំវិញ សេចក្ដីបៀតបៀន ការឆ្លងកាត់នៃពេលវេលា ឬសេចក្តីស្លាប់ក៏ដោយ (រ៉ូម ៨.៣៥-៣៩) ។ សេចក្តីស្រឡាញ់របស់ព្រះគ្រីស្ទលើសពីសេចក្តីស្រឡាញ់របស់មនុស្សលោកទាំងអស់ ពីព្រោះទ្រង់ គឺជាព្រះបន្ទូលដែលត្រឡប់ជាសាច់ឈាម ( ១ធីម៉ូថេ ៣.១៦ )
សេចក្តីស្រឡាញ់របស់មនុស្ស គឺអស្ចារ្យ ប៉ុន្តែពេលខ្លះយើងមានអារម្មណ៍ថា ដូចជាមានអ្វីដែលបាត់នៅក្នុងជីវិតរបស់យើង ។ ព្រះយេស៊ូវនឹងប្រើសេចក្ដីស្រឡាញ់ដ៏គ្រប់លក្ខណ៍របស់ទ្រង់ មកបំពេញភាពទទេក្នុងចិត្តរបស់យើង ទ្រង់នាំយើងមកជិតទ្រង់ដើម្បីឲ្យយើងបានសេចក្ដីអំណរដ៏ពេញលេញពិតប្រាកដ( យេរេមា ៣១.៣; ហូសេ ១១.៤; សេផានា ៣.១៧) ។ ទ្រង់សន្យានឹងយើងថាដរាបណាយើងស្វែងរកទ្រង់ឲ្យអស់អំពីចិត្ត នោះយើងនឹងរកទ្រង់ឃើញ ( យេរេមា ២៩.១៣ )
ប្រសិនបើអ្នកចង់ឲ្យមានបទពិសោធន៍នូវសេចក្តីស្រឡាញ់ដ៏គ្រប់លក្ខណ៍នេះ សូមមកស្គាល់សេចក្តីស្រឡាញ់ដ៏ធំរបស់ព្រះយេស៊ូវគ្រីស្ទ (១យ៉ូហាន ៤.១៦) ។ អ្នកអាចអានព្រះគម្ពីរ ដើម្បីយល់ពីព្រះពិត ហើយយល់ពីអ្វីដែលព្រះយេស៊ូវបានធ្វើចំពោះអ្នកដោយសារសេចក្តីស្រឡាញ់របស់ទ្រង់ អ្នកក៏អាចទៅវិហារព្រះយេស៊ូវពិត ដើម្បីស្តាប់ ទីបន្ទាល់របស់អ្នកផ្សេងៗទៀត អំពីបទពិសោធន៍អស្ចារ្យជាមួយព្រះ ហើយអ្នកអាចទាក់ទងជាមួយព្រះនៅក្នុងវិញ្ញាណតាមរយៈការអធិស្ឋាន ទូលប្រាប់ទៅកាន់ទ្រង់នូវតំរូវការទាំងអស់នៅក្នុងចិត្តរបស់អ្នក ហើយមិនយូរប៉ុន្មានអ្នកនឹងជួបប្រទះនូវសេចក្តីស្រឡាញ់ដ៏គ្រប់លក្ខណ៍ដែលបានរង់ចាំជាយូរមកហើយ។