ពិធីបុណ្យជ្រមុជទឹក

ហេតុ​អ្វី​បាន​ជា​ខ្ញុំ​ត្រូវ​ទទួល​បុណ្យ​ជ្រមុជ​ទឹក?

តើ​អ្នក​ធ្លាប់​គិត​ទេ​ថា ​តើ​មាន​ផ្លូវណា​​មួយក្នុង​ជីវិត​របស់​អ្នក​ ដែល​អ្នក​ពិត​ជា​អាច​ទម្លាក់ចុះអតីតកាល កម្ចាត់​ចោល​នូវ​រឿង​ចាស់ ហើយ​ចាប់​ផ្ដើម​សារ​ជា​ថ្មី​ឬ​ទេ?

ព្រះ​គម្ពីរ​ប្រាប់​យើង​ថា « ពី​ព្រោះ​គ្រប់​គ្នា​បាន​ធ្វើ​បាប ហើយ​ខ្វះ​មិន​ដល់​សិរីល្អនៃ​ព្រះ » (រ៉ូម ៣.២៣)។ ដូច្នេះ ព្រះ​យេស៊ូវ​​មានបន្ទូលថា​  « បើ​មិន​បាន​កើត​ជា​ថ្មី នោះ​គ្មាន​អ្នក​ណា​អាច​នឹង​ឃើញ​នគរ​ព្រះ​បាន​ទេ » (យ៉ូហាន ៣.៣)។

អ្នក​អាច​សួរ​ថា តើ​នេះ​អាច​ទៅ​រួច​ដោយ​របៀប​ណា? មាន​គេ​សួរ​ព្រះ​យេស៊ូវ​ថា៖ « ធ្វើ​ដូច​ម្តេច​នឹង​កើត​ឡើង​បាន … តើ​អាច​នឹង​ចូល​ទៅ​ក្នុង​ពោះ​ម្តាយ​ម្តង​ទៀត ហើយ​កើត​ឡើង​វិញ​បាន​ឬ? »

 ព្រះយេស៊ូវ​មាន​ព្រះបន្ទូល​ឆ្លើយ​ថា « ប្រាកដ​មែន ខ្ញុំ​ប្រាប់​អ្នក​ជា​ប្រាកដ​ថា បើ​មិន​បាន​កើត​អំពី​ទឹក ហើយ​អំពី​ព្រះវិញ្ញាណ នោះ​គ្មាន​អ្នក​ណា​អាច​នឹង​ចូល​ទៅ​ក្នុង​នគរ​ព្រះ​បាន​ទេ » (យ៉ូហាន ៣.៥)។ ព្រះយេស៊ូវធ្វើឲ្យយើងកើតជាថ្មីតាមរយៈពិធីបុណ្យជ្រមុជទឹក។

ព្រះ​គម្ពីរ​ហៅ​ពិធីបុណ្យ​ជ្រមុជ​ទឹក​ជា ​«​​ ការ​សំអាត​នៃ​សេចក្តី​កើត​ជា​ថ្មី » (ទីតុស ៣.៥) ដោយ​សារ​ការ​ជ្រមុជ​ទឹក​មាន​ប្រសិទ្ធភាពឲ្យ​ខាង​វិញ្ញាណរបស់មនុស្សរស់ឡើងវិញ។ ពេល​អ្នក​ជ្រមុជ​ក្នុង​ទឹករស់​ នោះ អំពើ​បាប​ត្រូវ​កប់ ហើយ​ពេល​អ្នក​ឡើង​ពី​ទឹករស់មក ​នោះ​អ្នក​នឹងបាន​រួច​ពីអំណាចនៃអំពើ​បាប ហើយ​ប្រដាប់ជីវិតថ្មី គឺ​ជីវិត​របស់​ព្រះ​យេស៊ូវ​គ្រីស្ទ (កូឡូស ២.១១-១៣)ត្រឡប់ជាមនុស្សថ្មី ដែលនៅក្នុងជីវិតមាន សង្ឃឹមអស់​កល្ប​ជានិច្ច។