សេចក្តីអំណរ
រឿងប្រៀបធៀបអំពីកូនពៅវង្វេង
ក្នុងចំណោមរឿងប្រៀបធៀបជាច្រើនដែលព្រះយេស៊ូវបានមានព្រះបន្ទូល ប្រហែលជាអ្វីដែលគួរឲ្យចាប់អារម្មណ៍បំផុតនោះ គឺរឿងប្រៀបធៀបអំពីកូនពៅវង្វេង។ តើកូនពៅវង្វេងជាអ្នកណា? យើងដឹងថាគាត់បានចេញទៅឆ្ងាយពីផ្ទះ ហើយរស់នៅក្នុងជីវិតក្រីក្រ លំបាក ខ្វះខាត និង បានប្រព្រឹត្តរឿងមិនល្អជាច្រើន។ គាត់បានរសាត់អណ្តែតនៅក្នុងលោកីយ៍ដែលគ្មានមេត្តាមួយនេះ ដោយសារតែគាត់បានចាកចេញពីគ្រួសារ និងឪពុកដែលស្រឡាញ់ដល់គាត់។ ការធ្វើដំណើរទៅទីឆ្ងាយ ហើយបានចាយបំផ្លាញទ្រព្យសម្បតិ្តទាំងអស់ ដើម្បីធ្វើឲ្យខ្លួនឯង បានសប្បាយរីករាយ។ រហូតដល់ថ្ងៃមួយ កូនពៅវង្វេងត្រូវពឹងផ្អែកលើការងារចិញ្ចឹមជ្រូក ដើម្បីចិញ្ចឹមជីវិតប្រចាំថ្ងៃ គឺបានធ្លាក់ខ្លួនចុះទាំងស្រុង។
ពេលខ្លះយើងដូចជាកូនពៅដែលវង្វេង នេះអញ្ជឹង។ នៅក្នុងជីវិតរស់នៅផ្ទាល់ខ្លួនរបស់យើងតែងតែស្វែងរកភាពរីករាយនៅក្នុងសមិទ្ធផលដែលយើងទទួលបាន បើមិនដូច្នេះទេ យើងអាច បណ្ដោយខ្លួនយើងដោយការផឹកស្រា ប្រើប្រាស់ថ្នាំញៀន ឬស្នេហាមិនស្មោះត្រង់ ដើម្បីកំដរអារម្មណ៍ បំបាត់ការលំបាកក្នុងជីវិត។ ប៉ុន្តែការធ្វើដូច្នេះ វានឹងមិនធ្វើឲ្យយើងរកឃើញសេចក្តីអំណរពិតនោះទេ ប៉ុន្តែវានឹងធ្វើឲ្យយើងកាន់តែខកចិត្តទទេថែមទៀត។
ការជួបជុំដ៏រីករាយ
ជាសំណាងល្អដែលកូនពៅវង្វេងមិនបានបំភ្លេចចោលទាំងស្រុងនូវប្រភពដើមនៃកំណើតរបស់គាត់។ ថ្ងៃមួយ គាត់បានភ្ញាក់ខ្លួនជាលើកដំបូង ហើយបើកភ្នែកមើលស្ថានភាពជុំវិញខ្លួនរបស់គាត់ ហើយគាត់បានសំរេចចិត្តថា «ខ្ញុំចង់ត្រឡប់ទៅឯឪពុកខ្ញុំវិញ»។ ដូច្នេះគាត់បានធ្វើដំណើរឆ្ពោះទៅស្រុកកំណើតរបស់គាត់ ហើយត្រឡប់ទៅនាដើមទ្រូងឪពុករបស់គាត់ដែលកំពុងតែនៅរង់ចាំ ហើយនេះជាការជួបជុំដ៏រីករាយដែលកម្រនឹងមាន។
អ្វីដែលគួរឲ្យកត់សម្គាល់បំផុតនៅក្នុងរឿងនេះ គឺមិនមែនថាគាត់នឹកឪពុករបស់គាត់នោះទេ ប៉ុន្តែ គឺជាឪពុករបស់គាត់វិញដែលបានរង់ចាំកូនប្រុសនៅមាត់ទ្វារទាំងយប់ទាំងថ្ងៃដោយទន្ទឹងរង់ចាំមើលការវិលត្រឡប់មកវិញរបស់កូនប្រុស។ រឿងនេះបានប្រាប់យើង ពីការបង្ហាញដ៏សំខាន់មួយ។ យើងអាចប្រហែលជាចង់ជួបព្រះវរបិតាដែលបានបង្កើតយើង តែចំពោះបំណងព្រះហឫទ័យរបស់ព្រះវរបិតាវិញ គឺចង់ឲ្យយើងត្រឡប់មកវិញ នោះខ្លាំងជាង។
ព្រះតែងយកព្រះទ័យទុកដាក់នឹងយើង
ចូរឲ្យយើងពិចារណា៖ តើព្រះយកព្រះទ័យទុកដាក់នឹងយើងយ៉ាងដូចម្ដេច? ព្រះអម្ចាស់យកព្រះទ័យទុកដាក់នឹងយើងខ្លាំងណាស់ ដែលព្រះបន្ទូលបានត្រឡប់ជាសាច់ឈាម ហើយជួបស្ថានភាពដូចយើងដែរ ដើម្បីរងទុក្ខជំនួសយើង ហើយទីបំផុតបានសុគតនៅលើឈើឆ្កាង។
« ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ( យ៉ូហាន ៣.១៦ ) ។
«ដូច្នេះ ខ្ញុំប្រាប់អ្នករាល់គ្នាថា ក៏មានសេចក្ដីអំណរ នៅមុខពួកទេវតានៃព្រះយ៉ាងនោះដែរ ដោយសារមនុស្សបាបតែ១នាក់ ដែលប្រែចិត្តវិញ» ( លូកា ១៥.១០ ) ។ មនុស្សនោះអាចជាខ្ញុំ ក៏អាចជាអ្នកដែរ ។
ចូរស្វែងរកអំណរពិត
មិត្តភក្ដិជាទីស្រឡាញ់ តើអ្នកកំពុងស្វែងរកហើយទន្ទឹងរង់ចាំសេចក្តីអំណរដ៏ត្រឹមត្រូវ និងយូរអង្វែងមែនទេ? ឬក៏សេចក្ដីអំណរដ៏ខ្លីទទេដែលផ្ដល់ដោយលោកីយ៍ ដែលមានភាពច្របូកច្របល់នេះឬ? សូមអ្នកចំណាយពេលខ្លះ ដើម្បីស្វែងយល់បន្ថែមអំពីព្រះតាមរយៈ ព្រះអម្ចាស់យេស៊ូវ។
ខ្ញុំមានឮសំឡេង១យ៉ាងខ្លាំង ចេញពីស្ថានសួគ៌មកថា មើល រោងឧបោសថរបស់ព្រះ បាននៅជាមួយនឹងមនុស្សហើយ ទ្រង់នឹងគង់នៅជាមួយនឹងគេ គេនឹងធ្វើជារាស្ត្ររបស់ទ្រង់ ហើយព្រះអង្គទ្រង់ក៏នឹងធ្វើជាព្រះដល់គេ ព្រះទ្រង់នឹងជូតអស់ទាំងទឹកភ្នែក ពីភ្នែកគេចេញ នឹងគ្មានសេចក្ដីស្លាប់ ឬសេចក្ដីសោកសង្រេង ឬសេចក្ដីយំទួញ ឬទុក្ខលំបាកណាទៀតឡើយ ដ្បិតសេចក្ដីមុនទាំងប៉ុន្មាន បានកន្លងបាត់ទៅហើយ។(វិវរណៈ ២១. ៣, ៤)
ដរាបណាអ្នកមានភាពក្លាហាន អ្នកនឹងអាចចាប់ព្រះហស្ដដែលលាតសន្ធឹងរបស់ទ្រង់ នៅជាមួយទ្រង់ ហើយរីករាយនឹងសេចក្តីអំណរពិតរបស់ព្រះអម្ចាស់។