សេចក្តីជំនុំជំរះចុងក្រោយ
តើពេលណាដែលព្រះយេស៊ូនឹងយាងមកម្តងទៀត?
« នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន ពុំនោះ ខ្ញុំបានប្រាប់អ្នករាល់គ្នាហើយ ខ្ញុំទៅរៀបកន្លែងឲ្យអ្នករាល់គ្នា បើខ្ញុំទៅរៀបកន្លែងឲ្យអ្នករាល់គ្នា នោះខ្ញុំនឹងត្រឡប់មកវិញ នឹងទទួលអ្នករាល់គ្នាទៅឯខ្ញុំ ប្រយោជន៍ឲ្យអ្នករាល់គ្នាបាននៅកន្លែងដែលខ្ញុំនៅនោះដែរ » (យ៉ូហាន ១៤.២-៣)។
ព្រះអម្ចាស់យេស៊ូវបានសន្យានឹងពួកសិស្សរបស់ទ្រង់ថា នឹងមានថ្ងៃមួយ ទ្រង់នឹងយាងមកម្តងទៀតដើម្បីទទួលយកពួកគេទៅផ្ទះនៅស្ថានសួគ៌វិញ។
ពិភពលោកនេះមិនអាចស្ថិតស្ថេរជារៀងរហូតបានទេ វានឹងបញ្ចប់នៅពេលព្រះគ្រីស្ទយាងមកម្តងទៀត។ គ្មាននរណាដឹងពីពេលវេលានោះ ពិតប្រាកដនោះទេ ប៉ុន្តែព្រះយេស៊ូវបានរំលឹកយើងថា នឹងកើតឡើងទីសំគាល់ខ្លះ៖ សង្គ្រាម អំណត់អត់ គ្រោះធម្មជាតិ អំពើបាបកើនឡើង ការបៀតបៀនសាសនា មនុស្សបដិសេធសេចក្តីពិត និងបំប្លែងសេចក្តីពិតនៃព្រះបន្ទូលរបស់ព្រះ នឹងការភាន់ច្រឡំកើតឡើង។
« រួចដោយព្រោះការទទឹងច្បាប់នឹងចំរើនជាច្រើនឡើង បានជាសេចក្ដីស្រឡាញ់របស់មនុស្សជាច្រើននឹងរសាយអស់ទៅ » (ម៉ាថាយ ២៤.១២)។
មនុស្សភាគច្រើន មិនដែលគិតពីការយាងមកជាលើកទីពីររបស់ព្រះគ្រីស្ទទេ។ ប៉ុន្តែ « នៅគ្រារបស់កូនមនុស្ស នោះនឹងកើតមានដូចជានៅជំនាន់លោកណូអេដែរ ដ្បិតនៅជំនាន់នោះ គេកំពុងតែស៊ីផឹក រៀបការប្ដីប្រពន្ធ ដរាបដល់ថ្ងៃដែលលោកណូអេបានចូលទៅក្នុងទូកធំ នោះទឹកក៏ជន់មកលិចបំផ្លាញគ្រប់គ្នាទៅ » (លូកា ១៧.២៦-២៧) ។ មនុស្សលោកដែលរស់នៅដោយសុខស្រួល នឹងមិនអាចទស្សន៍ទាយចុងបញ្ចប់នៃពិភពលោកនេះ (១ថែស្សាឡូនិច ៥.៣)។
យើងទាំងអស់គ្នាអាចមើលឃើញទីសំគាល់ និងសញ្ញា។ នៅពេលដែលអំពើហឹង្សា និងការប្រមាថព្រះកើនឡើងនៅក្នុងសង្គម ប្រទេសនីមួយៗស្តុកទុកអាវុធប្រល័យលោក មនុស្សបំផ្លាញបរិស្ថានអេកូឡូស៊ីនៃផែនដី យើងនឹងមានការភ្ញាក់ដឹងខ្លួនថា ខ្លួនឯងកំពុងអង្គុយនៅលើគ្រាប់បែកកំណត់ម៉ោង។ ចុងបំផុតនឹងមានថ្ងៃមួយនៃការកំណត់ពេលវេលារបស់ព្រះ នឹងត្រូវបញ្ចប់។ « ដំណឹងល្អនេះ ដែលសំដែងពីនគរ នឹងត្រូវប្រកាសប្រាប់ទួទៅគ្រប់ក្នុងលោកីយ ទុកជាទីបន្ទាល់ដល់អស់ទាំងសាសន៍ នោះទើបនឹងបានដល់ចុងបំផុត » ( ម៉ាថាយ ២៤.១៤ )។
ពេលនោះ ព្រះអម្ចាស់នឹងយាងមកវិញ ដើម្បីជំនុំជំរះលោកីយ៍ដោយសេចក្ដីសុចរិតរបស់ទ្រង់ ផ្ទៃមេឃនិងផែនដីនឹងឆេះរលាយអស់ ហើយធាតុសព្វសារពើនឹងរលាយទៅដោយកំដៅដ៏ក្រៃលែង។ ទ្រង់នឹងផ្តល់រង្វាន់ជីវិតអស់កល្បជានិច្ចដល់មនុស្សរបស់ទ្រង់ ហើយសងអ្នកដែលមិនជឿដោយការដាក់ទោសអស់កល្បជានិច្ច។