ព្រះវិហារ
តើព្រះវិហារជាអ្វី?
ពាក្យថា ព្រះវិហារ មិនសំដៅទៅលើកន្លែង ឬអាគារតែប៉ុណ្ណោះទេ ព្រះវិហារក៏សំដៅទៅលើពួកជំនុំដែរ មានទាំងអ្នកជឿពីអតីតកាល បច្ចុប្បន្នកាល និងអនាគតកាល។ ព្រះវិហារត្រូវបានបង្កើតឡើងពីមនុស្សរបស់ព្រះ។ ព្រះវិហារ លើសពីប្រទេស ជាតិសាសន៍ សម្ព័ន្ធភាពនយោបាយ និងវណ្ណៈសង្គម។ ព្រះយេស៊ូវគ្រីស្ទបានលោះយើងរាល់គ្នា «ដោយព្រះលោហិតទ្រង់ ចេញពីគ្រប់ទាំងពូជមនុស្ស គ្រប់ភាសា គ្រប់នគរ ហើយពីគ្រប់ទាំងសាសន៍ » ( វិវរណៈ ៥.៩; កិច្ចការ ២០.២៨)។
មនុស្សដែលមានគំនិតដូចគ្នាខ្លះអាចបង្កើតអង្គការមួយនៅក្នុងសង្គម។ ប៉ុន្តែព្រះវិហារត្រូវបានបង្កើតឡើងតាមរយៈអ្នកជ្រើសរើសរបស់ព្រះ។ ដូចជាព្រះអម្ចាស់របស់យើងបានមានបន្ទូលថា៖ « មិនមែនអ្នករាល់គ្នាដែលបានរើសខ្ញុំទេ គឺខ្ញុំទេតើ ដែលរើសអ្នករាល់គ្នាវិញ ទាំងតាំងអ្នករាល់គ្នាឲ្យទៅបង្កើតផល» (យ៉ូហាន ១៥.១៦)។ តាមរយៈពិធីបុណ្យជ្រមុជទឹក ព្រះលោហិតរបស់ព្រះអម្ចាស់បង្រួបង្រួមយើងទៅក្នុងរូបកាយរបស់ព្រះគ្រីស្ទ។ ពីនេះយើងអាចឃើញថាព្រះវិហារមានទំនាក់ទំនងយ៉ាងជិតស្និទ្ធទៅនឹងសេចក្តីសង្គ្រោះរបស់យើង។
ព្រះយេស៊ូវបានប្រទានដល់ព្រះវិហារនូវបេសកកម្មនៃការផ្សាយដំណឹងល្អ និងធ្វើពិធីបុណ្យជ្រមុជទឹកសម្រាប់ការប្រោសឲ្យរួចពីបាប (ម៉ាថាយ ២៨.១៨-២០) ដូច្នេះព្រះវិហារ តាមរយៈព្រះចេស្តារបស់ព្រះគ្រីស្ទ នឹងផ្សាយដំណឹងល្អដល់ទូទាំងពិភពលោក ហើយបន្តការសង្គ្រោះរបស់ទ្រង់តាមរយៈពិធីបរិសុទ្ធដែលអនុវត្តដោយព្រះវិហារ។ ព្រះវិហារគួរតែបង្រៀនអ្នកជឿឲ្យមានសេចក្តីជំនឿ ឲ្យគោរពតាមបទបញ្ញត្តរបស់ព្រះអម្ចាស់។
ព្រះវិហារគួរតែអនុវត្តការងារដែលព្រះអម្ចាស់បានប្រគល់ឲ្យ ដើម្បីត្រៀមខ្លួនសម្រាប់ការយាងមករបស់ព្រះគ្រីស្ទ។ ព្រះគម្ពីរពណ៌នាអំពីពិធីមង្គលការដ៏អស្ចារ្យរបស់ព្រះគ្រីស្ទ និងកូនក្រមុំរបស់ទ្រង់ ព្រះវិហារ (វិវរណៈ ១៩.៧-១០)។ ទីបញ្ចប់នៃផែនការនៃសេចក្តីសង្គ្រោះរបស់ព្រះកើតឡើងនៅពេលដែលអ្នកជឿត្រូវបានរួបរួមជាមួយនឹងព្រះគ្រីស្ទ ហើយនៅជាមួយទ្រង់ជារៀងរហូត។
ដូច្នេះ ការទទួលព្រះវិហារ គឺទទួលយកព្រះគ្រីស្ទ។ យើងមិនអាចបែកចេញពីព្រះកាយរបស់ព្រះអង្គសង្គ្រោះបានទេ ហើយយើងក៏មិនអាចទទួលបានសេចក្តីសង្គ្រោះនៅខាងក្រៅព្រះវិហារបានដែរ។ បើចង់ទទួលសេចក្តីសង្គ្រោះ គឺត្រូវក្លាយជាអ្នកជឿនៅក្នុងព្រះវិហារដែលរូបកាយរបស់ព្រះគ្រីស្ទ។